Þetta vilja börnin sjá!

myndlistarsyning galleri ormur

Sýning á myndskreytingum í íslenskum barnabókum 2010
September – Október 2011, í Gallerí Ormi

Farandsýning frá Gerðubergi.
myndskreyting
Myndskreytingar í íslenskum barnabókum 2010.

Sýningin er opin á afgreiðslutíma setursins – og þar fyrir utan samkvæmt samkomulagi.

Sýningin stendur fram yfir miðjan október.

Dimmalimm verðlaunin verða veitt fyrir bestu myndskreytingar í íslenskum barnabókum 2010 við opnun sýningarinnar.

Þetta vilja börnin sjá! er sýning á myndskreytingum úr nýútkomnum íslenskum barnabókum og hefur slík sýning verið haldin árlega í Gerðubergi frá árinu 2002. Markmið sýningarinnar er að beina athyglinni að gildi myndskreytinga í barnabókum. Þátttakendur keppa jafnframt um íslensku myndskreytiverðlaunin sem kennd eru við Dimmalimm. Verðlaununum er ætlað að hvetja bæði útgefendur og höfunda texta og mynda til frekari dáða. Dómnefnd velur eina bók og voru úrslitin kunngerð í Gerðubergi við opnun sýningarinnar, 23. janúar sl.

Þátttakendur í sýningunni í ár eru:

Adrian Sölvi Ingimundarson, Agnieszka Nowak, Anna Cynthia Leplar, Auður Ösp Guðmundsdóttir og Embla Vigfúsdóttir, Áslaug Jónsdóttir, Björk Bjarkadóttir, Brad D. Nault, Brynhildur Jenný Bjarnadóttir, Cassandra Canady, Elísabet Brynhildardóttir, Emily Weber, Erla Sigurðardóttir, Freydís Kristjánsdóttir, Guðrún Kristín Magnúsdóttir, Gunnar Júlíusson, Halldór Á Elvarsson, Halldór Baldursson, Hjalti Bjarnason, Inga María Brynjarsdóttir, Josefina Margareta Morell, Karl Jóhann Jónsson, Kristín Arngrímsdóttir, Kristín María Ingimarsdóttir, Matias Festa, Sigríður Ásdís Jónsdóttir, Sigrún Eldjárn, Sirrý Margrét Lárusdóttir, Þórarinn M. Baldursson, Þórey Mjallhvít H. Ómarsdóttir.

Karl Jóhann Jónsson hlaut Dimmalimm – íslensku myndskreytiverðlaunin 2010 fyrir bókina:
Sófus og svínið
sem gefin er út af Námsgagnastofnun.

Félag íslenskra bókaútgefenda, Myndstef og Eymundson standa að Dimmalimm verðlaununum ásamt Menningarmiðstöðinni Gerðubergi. Í dómnefndinni voru Aðalsteinn Ingólfsson, fulltrúi Gerðubergs, Bryndís Loftsdóttir, fulltrúi Eymundsson og Kalman le Sage de Fontenay, fulltrúi Myndstefs.

Aðalsteinn Ingólfsson sagði m.a. í rökstuðningi sínum:

Stundum gleymist að barnabækur eru ekki einskær afþreying og skemmtun fyrir smáfólkið: þær hafa einnig fræðslugildi. Sú bók sem hlýtur Dimmalimm-myndlýsingarverðlaunin í ár hefur eiginlega töluvert meira fræðslugildi en umfang hennar ber með sér. Mynda-og textahöfundur hennar, Karl Jóhann Jónsson, er myndlistarmaður og myndlistarkennari. Verðlaunabók hans, Sófus og svínið, sem gefin er út af Námsgagnastofnun, er tilraun til að vekja áhuga yngstu nemenda á myndlist og hjálpa þeim að njóta hennar. Söguhetjan Sófus málar fyndin tilbrigði um andlitsmyndir eftir marga frægustu listamenn sögunnar, en þær eru æði litaðar af nærveru aðstoðarmannsins, svínsins Konráðs.

Í bókinni má síðan bera saman örmyndir af frummyndunum og útleggingar Sófusar, og klykkt út með „Umræðupunktum“ fyrir börn, sem jafnvel sjóaðir listunnendur hefðu gagn af að kynna sér, til að mynda um tilgang og réttmæti þess að breyta myndum annarra eftir eigin höfði. Allt kemst þetta til skila, þótt brot á bókinni verði að teljast í naumara lagi miðað við ásetning höfundar. Utan bókar og í fullri stærð eiga „paródíur“ Karls Jóhanns síðan erindi við langtum fleiri en smáfólkið; raunar vildi ég gjarnan sjá sérstaka sýningu á þeim öllum. Í leiðinni get ég upplýst að uppáhaldsmynd mín í bókinni er „svínslega“ sjálfsmyndin af Fridu Kahlo.

Eftirtaldir listamenn hafa áður hlotið Dimmalimm verðlaunin:

2009  Ragnheiður Gestsdóttir fyrir bókina Ef væri ég söngvari
2008 Kristín Ragna Gunnarsdóttir fyrir bókina Örlög guðanna sem skrifuð er af
Ingunni Ásdísardóttur
2007 Sigrún Eldjárn fyrir bókina Gælur, fælur og þvælur
2006 Björk Bjarkadóttir fyrir bókina Amma fer í sumarfrí
2005 Áslaug Jónsdóttir fyrir bókina Gott kvöld
2004 Áslaug Jónsdóttir fyrir bókina Nei, sagði litla skrímslið
2003 Brian Pilkington fyrir bókina Mánasteinar í vasanum
2002 Halla Sólveig Þorgeirsdóttir fyrir bókina Engill í Vesturbænum sem skrifuð er
af Kristínu Steinsdóttur

Skildu eftir svar

Netfang þitt verður ekki birt.