Um Sögusetrið

Víkingakonur tilbúnar til orrustu Hópur víkinga með alvæpni Upplýsingar fyrir ferðamenn Matsalurinn í Sögusetrinu er veglegur Safnið í Sögusetrinu Sýningarmunir í safninu

Sögusetrið á Hvolsvelli er menningarmiðstöð Rangárþings eystra.
Þar eru til húsa stórmerkar sýningar og söfn sem tengjast menningu sveitarfélagsins, fyrr og nú.

Auk þess er í Sögusetrinu boðið upp á fjölbreytta menningarviðburði og skemmtanir árið um kring – ritlist, fræði, myndlist, leiklist, tónlist, glens og gaman.

Þá skipuleggur starfsfólk Sögusetursins ferðir á Njáluslóðir með fræðandi og skemmtilegri leiðsögn á nokkrum tungumálum. Einnig er boðið upp á veislur í setrinu – mat og drykk.

Í Sögusetrinu er að finna tvær viðamiklar sýningar sem eru einstakar í sinni röð: Njálusýningu og Kaupfélagssafn.

Njálusýningin. Þar er Brennu-Njálsssaga kynnt í máli og myndum á einkar skemmtilegan, aðgengilegan og fræðandi hátt: sögutími Njálu og ritunartími, heimsmynd miðalda, söguöldin, þjóðveldisöldin, víkingaöldin, landnámið, stafrófið og leturgerðin, bókagerðin, fatnaður og vopn, heiðinn siður og kristinn, og sagan sjálf sérstaklega – bygging hennar og sérkenni, tímatal og tímarás, heimkynni og sögustaðir, helstu atburðir og persónur … svo fátt eitt sé nefnt.

Kaupfélagssýningin. Þar sem gestir upplifa verslunarhætti og þjónustuhætti kaupfélaganna á síðustu öld. Þar er urmull af spennandi gripum, myndum, tækjum og tólum úr sögu kaupfélaganna á Suðurlandi.

Sýningarsalurinn Gallerí Ormur er myndlistarsalur sem einnig er nýttur til tónleika og kóræfinga. Þar eru reglulega sýningar listamanna úr Rangárþingi eystra, auk sýninga annarra áhugaverðra listamanna, ekki síst þeirra sem fengið hafa innblástur úr menningu og náttúru héraðsins.

Þá geymir Sögusetrið stórt líkan af alþingi á Þingvöllum árið 1000 sem sett var upp í tilefni af Kristnitökuhátíðinni sumarið 2000. Þar geta gestir séð með eigin augum búðaskipan og þinghald þetta örlagaríka sumar þegar heiðinn siður var af lagður og kristni lögtekin.

Söguskálinn er í miðju Sögusetrinu. Einstakur veitingasalur í anda langhúsanna til forna. Hann tekur allt að 100 manns í sæti. Þar er einnig bar og öflugt kolagrill. Inn af salnum er fullbúið eldhús. Salurinn nýtist við hin ýmsu tækifæri – til veislu- og fundahalds, tónleika, leiksýninga, upplestra, listkynninga, vörukynninga, skemmtana, gestaboðs og samkvæma af öllu tagi. Salurinn er jafnframt leigður út ásamt eldhúsaðstöðu gegn vægu gjaldi.

Í Sögusetrinu er aukinheldur minjagripa- og bókaverslun.